Laascaanood : Guluf colaadeed oo ku soo aaddan deegaanka Sool (12.15.2007)

Sida ay Caynaba News ka heleyso ilo xogogaal ah waxa maalmaha dhow ku soo fool leh Gobolka sool ciidammo huwan ah oo muddo bil iyo badh ah lagu ururinayey goobo ka mid ah gobollada Nugaal, Bari iyo Woqooyiga Mudug. Ciidammadan ku soo wajahan Sool ayaa dabayaaqadii bishii November waxa dhawr goobood ka mid ah gobollada Puntland uga degey saanad millateri oo aad u xoog leh.

Gobolka Nugaal iyo koonfurta Sool ayaa hadda la ciirciiraysa maleeshiyo biirebiire ah oo la isaga keenay gobollo dhawr ah iyo Kililka 5 aad ee Ethiopia. Ciidamadan oo sida la sheegayo kor u dhaafay 2800 oo maleeshiyo ayaa laga soo ururiyey meelo badan ka dib markii Garaaddada iyo waxgaradka beelihii Dhulbahante ee looga itaal roonaaday Laascaanood ay qaylo-dhaan xoog leh u direen wax ay ugu yeedheen beelweynta "Daarood". Ciidamadan sida la soo werinayo waxay ka kooban yihiin qiyaastii sidatan.

Beelaha Dhulbahante 830 Maleeshiyo
Beesha Majeerteen     390 -//-
Beesha Warsangali      153 -//-
Jabhadda ONLF          280 -//-
Ugaadeenka kale         350 -//-
Beesha Wagardhac      130 -//-
Askarta DFKM            220 -//-
C/mada D/wiishta PL 470 -//-
_______________________
Wadarta                      2823 Maleeshiyo

Ciidamadan oo sida wararku sheegayaan loo kala qaybshey dhawr aag oo uu ugu xoog badan yahay kan Laascaanood oo la doonayo in guluf xoog leh lagu qaado. Waxa wararku intaas ku darayaan in ciidankani weerarkiisa ku ballaadhin doono qaybo badan oo ka mid ah gobolka Sanaag iyo deegaanka Buuhoodle iyagoo kaashanaya dad deegaanka ah ugana dan leh in lagu kala dhantaalo awoodda ciidamada qaranka ee fadhida daafaha caasimadda gobolka Sool ee Laascaanood.

Maleeshiyadan qayla dhaanta iyo "Tolla'ayeeyda" lagu soo ururshey waxay, sida ay sheegeen, beegsanayaan kuna naaloonayaan inay gaadhaan deegaanka Caynaba.

Sida uu noo sheegay sarkaal sare oo ka tirsan ciidamada Qaranka ayuu ku sheegay in ay aad ula socdaan abaabulka ka socda Garoowe iyo ciidamada la soo dhoobay deegaanno badan oo ay ka mid yihiin TUkaraq, Ganbadhe, Xuddun, Xiingalool, iyo deegaanno ka tirsan Buuhoodle.

Si kastaba ha ahaatee waxaad mooddaa in hadafkii Majeerteen ee ahaa inay Laascaanood gubaan uu u rumoobayo iyagoo sida la sheegay cashar ugu dhigaya beelaha deegaanka Laascaanood ee Bahararsame iyo Jaamac Siyaad oo iyagoo kaashanaya Ciidamada Qaranka Somaliland la wareegay magaalada Laascaanood bishii Oktoobar ee sannadkan. Dagaalkan ayaa sida la saadaalinayo noqonayo kii lagu kala nasan lahaa oo hadba qoladii itaal roonaataa u hadhayso deegaanka lagu hardamayo ee koonfurta Sool.