Guddoomiyaha Golaha Fulinta ee GMMI Soomaaliyeed, Sheekh Shariif Sheekh Axmed oo booqasho ku jooga wadanka Yemen ayaa shir la qaatay madaxweynaha dalkaasi Mudane Cali Cabdalla Saalax.

Gudoomiyaha iyo waftigiisa oo uu ka mid yahay Prof. Ibraahim Caddow, Madaxa Arrima Debedda ee GMMIS, ayaa waxa uu u gudbiyay Madaxweynaha Yemen war bixino ku aadan fara galinta ciidamada Ethiopia iyo waliba Mowqifka maxkamadaha islaamka ay ka taagan yihiin arinkaasi. Sheekh Shariif ayaa sida la sheegay u caddeeyey Cali Cabdalla Saalax inaanay waxba ka qabin inay la hadlaan Ethiopia, haddii uu Melez Zenawi ciidamadiisa kagala baxo dalka Soomaaliya muddadii 7 maalmood ahayd ee ay u qabteen. Booqashadan Guddoomiyaha ayaa ka danbaysay martiqaad uu ka helay Madaxweynah dalka Yemen.

Prof, Ibraahim Caaddow oo isagu saxafiyiinta uga waramay kulankaasi ayaa waxa uu sheegay in kulanka diiradda lagu saaray sidii loo sameyn lahaa xidhiidj wanaagsan oo dowladda Yemen iyo maxkamadaha ay yeeshaan. Madaxweynaha dalka Yemen cali cabdalle saalax oo kulankaasi ka hadlay ayaa waxa uu sheegay in dowladda Yemen ay ka go’an tahay xal lagu soo dabaalo dalka Somalia, isagoo sheegay in uu ku dadaalayay 16 kii sano ee la soo dhaafay xal laga gaadho arimaha murugsan ee Somalia.

Madaxweyne Cali cabdalle Saalax ayaa ku qanciyay Gudoomiyaha Golaha Fulinta Maxkamadaha Islaamka, Sheekh Shariif Sheekh Axmed ,in aanu taageero dambe siin doonin dhinac ka mid ah kooxaha isku haya Somalia. Maxkamadaha islaamka ayaa kal hore ku eedeeyay dowladda Yemen in ay hub siisay dagaal-ooge C/laahi Yuusuf.

Kulankaan oo ka dhacay xarunta madaxtooyada Yemen ayaa ku soo gabogaboobay jawi wanaagsan oo is faham ku dheehan yahay. 

Xasuuqan Ulakac ah